Seattle Chin Baptist Church

SEATTLE CHIN BAPTIST CHURCH
HRUAINAK PHUNGHRAM LE PHUNGLAM
(CONSTITUTION AND BY-LAWS)

Biahmaithi (Preamble)
Pathian innchungkhar ah Thiangthlarau nih lungthin khat tein a kan fun i pum khat sinak lei ah a kan hruai tiah kan zumh. Cu caah, Seattle Chin Baptist Church nih a tanglei khrihfabu hruainak phunghram (constitution) hi kutken ah i tlaih in hi khrihfabu cu March 15, 2014 ah kan dirh. Hi hruainak phunghram (constitution) cherhchan in khrihfabu hruainak phunglam (by-laws) zong kan ser. Cun, kan khrihfabu meeting biachahnak tuah nak ah parliamentary phung cu kan kutken ah kan i tlaih.

Dal I: Min le Umnak Hmun (Name and Location)

Hi khrihfabu min cu, Seattle Chin Baptist Church ti a si lai i, a tawinak in SCBC ti a si lai.
A umnak hmun cu Seattle, WA USA ah a si lai.
Hi phunghram cu, SCBC Hruainak Phunghram (The Constitution of SCBC) ti a si lai.

Dal II: Tinhmi (Purpose)
Khrihfabu cu Thiang Thlarau thawng in Zisuh Khrih chungah Pathian nih a ser mi zumtu phu a si. Zumtu a si mi kan nih cu vawlei khuazakip ah Pathian khamhnak thawngtha le Zisuh Khrih vel le dawtnak tehte kan si.
Cu ca ah hi khrihfabu nih aa tinhmi mi cu:
Zisuh Khrih vel le khamhnak thawngtha kha a zumtu he zumlo tu sin he phuan ding
Pathian dawtnak kha herhbau in a um mi, mizaw mi har, le sifak santlai lo mi sin ah langhter ding

Zisuh Khrih ah pumkhat sinak kha pakhat le pakhat kan zawn kan i ruah nak le dawtnak ah langhter ding
Kan chuahkehnak holh a si mi Lai holh in hmun khat te ah Pathian biaknak le i hawikomhnak ngeih ding
Kan nunphung, ca le holh a lam kip in dirhkamh ding.

Dal III: Zumhnak Tlaihtleng (Statement of Faith)
Hi khrihfabu nih Thumkomh Pathian a si mi, Pa, Fa, Thiangthlarau a zumh.
Hi khrihfabu nih Zisuh Khrih cu Bawi le Khamhtu a si i, Khrih thawngtha cu a zum mi hna khamhnak Pathian thawnnak a si tiah a zumh.
Hi khrihfabu nih Baibal cu kan zumhnak, kan i cawnpiaknak le thithruainak ca ah hrampi a si tiah a zumh.

Dal IV: Chungtel Sinak (Membership)
1. Chungtel Luhnak
Zisuh Khrih a thihnak le thawhthannak kha a zum i, hi khrihfabu hruaining phunghram a cohlang i chungtel si a duh mi paoh cu chungtel si awk ah cohlan an si lai.
Chungtel si a duh mi nih chungtel si a duhnak kha ca, a si lo ah, bia in a langhter hnu ah cohlan a si lai. Khrihfabu nih chungtel luhnak catlap (membership form) a ngeih lai.
Chungtel lakah: (1) Tipil ing cia le (2) Tipil ing rih lo ti in cazin chiah a si lai.
2. Chungtel Ngolnak
Chungtel pakhat khat cu khrihfabu dang ah thialnak—ca in siseh hmurka in siseh—theithternak a tuah ahcun chungtel sinak in ngolter a si lai.

Chungtel pakhat khat cu khrihfabu dang ah siseh, hmun dang ah siseh, aa thial ti thawng kan theih ahcun khrihfabu nih hlathlainak a tuah hnu ah chungtel sinak in ngolter a si lai.
Dal V: Khrihfabu Hruainak Phung (Church Polity)

Hi khrihfabu ah Bupi Meeting (General Assembly) a um lai i cu nih cun nawlngeihnak sangbik a ngeih lai.
Hi khrihfabu i hruainak ah tlam a tlin khawh nakhnga, a tanglei rian tuantu hna hi Bupi Meeting (General Assembly) nih a dotdot in a ser lai. An rian tuan ning cu phunglam (by-laws) chungah telh a si lai.
Pastor (dihlak)

Khrihfa Upa (Board of Deacons)
Lutlai Bu (Officers Council)
Tawlrel Bu (Executive Committee)
Lairel Bu (Church Council)
Rian Tuannak Dang (Other Ministries)
Dal VI: Thim Caan (Terms of Office)
Hi khrihfabu rian tuantu hna thim caan cu a tanglei bantuk in a si lai:

Pastor cu kum khat ah voi khat in an kong ceihkhan piak an si lai. An kong ceihkhan piak tikah:
Khrihfabu nih an rian pehzulh ter a herh le herh lo kong kha a ceihkhan lai. Pehzulh ter an si ahcun a hmai kum zong an peh thaan lai.
Pastor thlahlawh (salary) kong zong ceih piak an si lai. An thlahlawh an i zat le zat lo kong ceihkhan piak an si lai.

Tawlrel Bu (EC) le Lairel Bu (CC) nih a herh ning in an ceihkhan hnu ah pastor zohkhenhnak kong ruah piak ding an si lai.
Khrihfabu chung hruaitu dang vialte cu kum khat ah voi khat in thim an si lai. Hruaitu pakhat cu mipi nih an thim nolh ahcun pehzul tein tuan khawh a si lai.
Hi khrihfabu ah a tlawmbik thla ruk tal chungtel a si mi le, hi phunghram a cohlang tu lawng khrihfa upa ca ah thim khawh an si lai.
Khrihfa upa kum khat a tuan cia mi lawng OC upa ah thim khawh an si lai.
Dal VII: Pathian Biak Pumhnak (Worship Service)

Hi khrihfabu cu Pathian biak thangthatnak, thlarau lei ngandamnak, Pathian Bia in i hawikomhnak le thazaang i peknak ca ah Zarhpi Ni tin Pathian biak pumhnak a ngei lai. Pumh caan paoh ah thawhlawm khawlhnak a tuah lai.

Khrihfa calendar chung i a um mi khrihfa ni sunglawi paoh kha ningcang tein hman khawh aa zuam lai.
A herh bantuk in Pathian biak pumhnak dangdang zong Pumh Komitti le Tawlrel Bu (EC) hruainak in tuah a si lai.
Dal VIII: Meeting (Business Meetings)
Khrihfabu chung komitti kip nih anmah le rian tuan ning cio hoih in meeting an ngei lai. Biahmaithi ah langhter a si cang bantuk in, meeting biachahnak tuah tikah parliamentary phung zulh a si lai.

Bupi Meeting cu a tanglei bantuk in tuah a si lai
Kum khat ah voi hnih tuah a si lai: kum thawk (January) le kum dongh (December) ah tuah a si lai.

Hi meeting ah chungtel dihlak i tel khawh a si lai i, tipil ingcia lawng nih bia chahnak tuah tikah kut hler (vote pek) nak nawl an ngei lai.
Poipang a um tikah, Tawlrel Bu (EC) nih ruahnak a pek bangin Lairel Bu (CC) nih Bupi Meeting (General Assembly) cu a auh khawh lai.

Bupi Meeting a tuanvo biapi bik cu:
Khrihfabu hruaitu upa vialte cu kum dongh (December) meeting ah a thim hna lai.
Rian tuantu komiti cio nih kum dongh meeting ah theihternak (report) an tuah mi a fehter lai.
Rian tuantu komiti cio nih kum khat chung cawlcanghnak (one year planning) an suai mi cu, EC le CC nih a dot dot in a ceih hnu ah kum thok General Meeting nih a fehter lai.
Dal IX: Meeting Tlinnak (Meeting Quorum)
Hi khrihfabu i komitti kip nih bia ceih khuakhaannak an tuah tikah a tanglei hi an zulh lai.

Komiti chungtel hnarcheu nak tam an chuah lawng ah meeting cu a tling tiin ruah a si lai i, bia ceih/khuakhaannak tuah khawh a si lai.
Meeting a kaimi zatceo nak tam deuh hnatlaknak in biachahnak tuah a si lai.
Khrihfabu ah biapi a si mi a tanglei hna cu meeting a chuak mi cheu thum ah cheu hnih (2/3) hnatlaknak in biachahnak tuah a si lai.

Pastor laknak le rian dinhternak

Aa thial kho lomi inn le thilri cawknak/zuarnak
A biapi mi kong ceihkhan ding ah meeting auh tikah, a voi khatnak ah minung (quorum) an tlin lo ahcun a voi hnihnak cu a chuak zat in biachahnak tuah khawh a si lai.
Dal X: Khrihfabu dang he Pehtlaihnak
Hi khrihfabu pomning le tinhmi he aa khat mi khrihfabu dang le phu dang he zong pehtlaihnak le hawikomhnak a ngei kho lai.
Dal XI: Hruainak Phunghram Fehternak
Hi khrihfabu hruainak phunghram cu Bupi Meeting (General Assembly) a chuak mi chungtel cheu thum ah cheu hnih (2/3) hnatlaknak in fehter a si lai. Bupi Meeting nih a fehter ni thawk in hi hruainak phunghram cu hman colh khawh a si lai.

Hi hruainak phunghram cu khrihfabu chung in chungtel pakhat khat nih thlen awk, a si lo ah remh awk a herh tiah a hmuh ahcun thlen/remh a duh nak zawn kha ca tial in Tawlrel Bu (EC) sinah a chuahpi hmasa lai i, Tawlrel Bu (EC) nih hnatlaknak a ngeihpi hnu ah Lairel Bu (CC) sinah lanhter a si lai. Lairel Bu (CC) nih hnatlaknak a ngeihpi hnu lawng ah Bupi Meeting ah chuahpi a si lai i meeting a chuak mi cheu thum ah cheu hnih (2/3) hnatlaknak lawng in remh, chap, thlen, hrawh khawh a si lai.