Zotung Christian Church

*******ZCC-INDIANA HISTORY*******

Atunin kya ra ukkunaw a hoi khyh kiaccuze Zotung minphuin nynh mah ra takyh a thua ku bua vae. India langte thuasah Malaysia langte thuasah vawsaw/runaw pataepi tein te Pachia nynh thaw yng ccihzah atunin kya Zotung minphuin nynh mah ra thungnaw lang pataepi a thua bua vae oh. Bawipaw min thehooy te ung sah.

Chin minphuin athunglu te ungnaw Indianapolis hynh USA Chin khawlupi cite la nynh paw thuazah, tu e-khua kya tuh Zotung Minphuin nynh mah kum 2007 kya khe khawsah thokhae a la thua buavae. Thuasahlamah, Zotung milu a zya kiaccuze pungkunaw hoi kho la thua la khyh. A ccynh liazah kum 2009 kya vaetetuh Zotung miphuin milu 17 lae nynh Indianapolis kya khua kae la sah bua vae. Kum 2009 Christmas tua kunaw pungkunaw kyate, piccahae lungthin kya naw kheh vae kheh pungku rynaw thinlung yn pou zah, Kum 2009 Christmas zerya ma kyngte meeting tuaku thuazah Indiana Zotung Christian Fellowship thadyng khae lang te; naw kheh vae kheh pungkunaw hoi la cipaw tuh, Indianapolis Zotung minphuin ungpaw milu 17 nynh nawccawnaw kae la hoi. 26 December, 2009 kya fellowship pungkunaw vae khehnaw tuh hoi a la thua.

Bawipaw thawccinaw liate, Fellowship kae thadyngnawte kum nin yn civaetetuh Indianapolis Zotung minphuin milu 35 kae la ci bua vae. Fellowship pukunaw kya kae sawsanaw tuh milu pung thungnaw lang te ZCC Krihccawbuu thadyng kho buanaw lang nynh la thua. Tamawtuh minphuin ccanglang pungku bua la thua zah, bya thae khyh kiaccuze mawte krihccawbuu thadyng khae rynaw lungthin yn pou. October 02, 2012 - ZCC thadyng kae lang vae cite meeting tua ku la thua zah, Bawipaw nynh kae paccyngkunaw sawsanaw ccing sah te November 06, 2011 kya Rev. Kaw Kung nynh sawsanaw te Zotung Christian Church – Indiana tuh thadyng khae a la thua. Zotung Christian Church – Indiana krihccawbuu nynh kae sawsanaw yng ccingsah tu Pachia min kae thehooy sah. ZCC-Indiana yng hungpatu Rev. Kaw Kung tungvaw ZCC- Indiana krihccawbuu nynh lungtuanaw a le pi kae hoi. Khrihccawbuu phuinpoi kya thawzung yn pyatuhae: ZCC-DC, ZCC-GA te ZCC-KS hae tungvaw zemah lungtuanaw a lepi kae hoi.

ZCC-Indiana krihccawbuu nynh a paccyngkunaw tuh, a zobyate a zo hlawte Pachia thehoi sahte, A penaw te A ra halang ryalawnaw kya; Pachia peenaw te a dingnaw kha masaty ccung nynh thua.

----Zutung Christian Church-Indiana----